I projektuar si një restorant i kuzhinës fusion, Gate 03 përfaqëson një nga projektet që i kushtohet tërësisht detajeve të elementeve të brendshme. Fasada e ndërtesës është zhvilluar në formën e një blloku të lartë për të ndarë dhe izoluar plotësisht zonën e restorantit nga ambientet rrethuese (rruga dhe pjesët e tjera të qytetit), duke e orientuar tërësisht ambientin e brendshëm drejt bregdetit. Shumë elementë janë marrë nga mjedisi përreth, ndër të cilët koncepti i velave të anijeve që janë ripërdorur në kurbat e shumta të tavaneve, duke formuar një lojë të veçantë dritë-hije. Për të balancuar format e ndryshme gjeometrike të ambientit të brendshëm, propozohet përdorimi i një materiali të vetëm në veshjen e brendshme, gjë që thekson minimalizmin e kësaj hapësire. Përmes integrimit të elementeve të frymëzuara nga arkitektura orientale dhe përfshirjes së gjelbërimit në hapësirat e brendshme të restorantit, ky projekt synon të theksojë rëndësinë e jetesës në prani të natyrës.